Arangkada for May 13, 2007

       KATUNGOD SA DI PAGBOTAR

 

       Di kong kabotar karong eleksiyona.  Maong di ko magtagad paglista sa mga kandidato nga akong pilion.  Di ko maghasol pagplano unsang orasa ko nga moadto sa presinto aron pagtuman sa akong katungod ug katungdanan sa pagpili.  Kataposan kong nakabotar niadtong 1984.  Wa ko marehistro.  Di tungod sa pagpabaya.  Kon dili tungod kay nawad-an na kog salig sa sistema sa piniliay.

Nagpabilin kong kumbinsido nga bisan unsay mahitabo karong eleksiyona, human sa nagbaha nga mga saad ug panumpa sa kausaban sa tulo ka buwan nga kampanya, magpadayon ang nangalisbong eskandalo—ang katawhan, nga ang kinabag-an maglugos pagkaon, pagpatambal ug pag-eskuyla, dumalahon sa mga politiko nga ang kinabag-an mga bilyonaryo ug mga milyonaryo.

-o0o-

        Wa ko mag-inusara.  Nakaseguro kong dunay pipila nga nagbasa ini nga susama og baruganan.  Busa di ako rang usa ang maigo sa tulisok nga ang katawhan nga wa na manginlabot apil sa mabasol sa pait nga kahimtang sa atong nasud.  Ug di ako rang usa ang manalipod nga ang di pagbotar usa ka lehitimong paagi sa pagprotesta sa pagkahimo sa mga piniliay nga kahimanan sa pagbugalbugal, inay pagpatigbabaw, sa kabubut-on sa mga botante.

        Kon di eleksiyon, ganahan ba diay kog rebolusyon?  Di sab.  Padayon kong nangandoy nga atong maangkon ang usa ka malinawon apan matinud-anong kausaban.  Nga di mahitabong maggikan sa mga eleksiyon kon ang mga lagda pabilin nga magsilbing garantiya nga ang mga dato ug ang mga gamhanan, ginamit ang ngan sa makaluluoyng mga kabos ug mga timawa, mopasamot lang pagpalig-on sa ilang pagkontrolar sa gahom.

-o0o-

Apan mokumpisal ko nga nahasol ko sa mga sugyot nga mas mapadali ang kausaban nga akong gidamgo, nga mahibalik ang tinuorayng diwa sa piniliay, kon aktibo kong manginlabot, inay mangiyugpos ug mopalayo.  Wa ko mangiyugpos.  Padayon kong nakigbisog alang sa kausaban.  Pinaagi sa akong tulomanon sa radyo.  Pinaagi ning akong lindog.  Di lang gyod kong kakita sa akong kaugalingon nga mangampanya og kausaban pinaagi sa piniliay.

Ang wa pagkarehistro nakaluwas nako gikan sa mga nanghaylo pagpadagan nako sa nagkalainlaing katungdanan.  Bisan narehistro pa, ako gihapon silang balibaran.  Labing dako nakong kahadlok mao nga kon di ko malamoy sa nangalisbong sistema, patyon ko sa mga nakapahimus sa sistema sa unang adlaw pa lang nako sa katungdanan.

-o0o-

Sa di pa ka moingon nga inamaw ning ako, pahibaw-on tika nga duha sa labing dagko og gimbuhaton karong eleksiyona, sama nako, di sang kabotar:

·         Nasuwat na nako nga si Cebu Provincial Election Supervisor Lionel Marco Castillano nihunong pagbotar kay alang niya ang nangaging mga piniliay gidominahan sa mga politikong di takos sa mga katungdanan nga ilang nadag-an; ug

·         Si PRO 7 Director Silverio Alarcio di hinuon aktibista, di siyang kabotar kay di kapauli sa iyang lalawigan sa Pangasinan.  [30]  leo_lastimosa@abs-cbn.com

Arangkada for May 12, 2007

        NANGUTANA LANG

 

        Karong napakita nang Crisologo Saavedra ang labing bag-ong dokumento nga iyang nakuha gikan sa kasaligang mga tinubdan sa Kapitolyo, nga nagtumbok nga dunay dugang P261 milyones nga naggasto sa pagtukod sa Cebu International Convention Center (CICC), mahimo bang tubagon ni Gobernador Gwen Garcia ang mosunod nga mga pangutana sa nagpakabana nga Sugbuanong mga magbubuhis?:

·         Tinuod bang nagsuwat si Willy Te, bise presidente sa WT Construction,  ngadtong Garcia niadtong Pebrero 21 ning tuiga nga naningil og dugang bayad sa iyang trabaho sa CICC?;

·         Kon tinuod man, gituyo ba ni Garcia pagtago ang P621 milyones o nataligam-an lang tungod sa kataas sa iyang upat ka oras nga diskurso sa Capitol Social Hall nga gawas nga nilapas sa tingpaniudto nitilok pa gyod sa bisan unsang kahigayonan sa mga pangutana gikan sa mga nanambong?; ug

·         Kon di tinuod, giunsa man nila pagpalihok ang CICC nga way electrical ug plumbing works (P85 milyones) ug site development, structural, civil ug architectural works (P176 milyones)?

-o0o-

        Ang P261 milyones nga "final billing" lisod nang  ihapak sa laing proyekto sa Kapitolyo kay nagda na sa apelyido nga "Cebu International Convention Center (CICC), North Reclamation Area, Mandaue City."   Maglisod na sang Kapitolyo pagpatong ini sa burot nang daan nga gahin sa CICC kay nakabungat na si Garcia nga P581 milyones ray kinatibuk-ang gasto sa kontrobersiyal niyang proyekto.   Gikutlo sang Saavedra ang iyang mga tinubdan sa Kapitolyo nga nagkanayon nga gawas nga way kontrata ni subasta ang trabaho sa WT, wa pa gyoy gahin nga bisan usa ka dako gikan sa Cebu Provincial Board.

        May sukaranan bang nitumaw nga mga pagduda nga ang P261 milyones isukip na lang sa dugang gasto sa gitakda nga "reconfiguration" sa CICC karong tuiga?  Kon tinuod man, gibaraw na silang daan ni Saavedra:   Di ni mahimong palutson nga kabahin sa "reconfiguration" kay kining maong mga trabaho (sama sa pagbutang sa mga linya sa tubig ug kuryente) batakan mang mga panginahanglan paghingpit sa CICC.   Kon wa pa ni mahuman sa Disyembre sa niaging tuig, mag-ngiob ug mangalisbo unta ang CICC sa pagsud sa mga pangu sa kanasuran nga nitambong sa East Asean Summit.

-o0o-

        Ang bag-ong kasayuran nga gipaulbo ni Saavedra nakapatumaw sa makahasol nga mga pangutana labot sa kaligdong ni Garcia:

·         Siya ba lang diay magbuot giunsa paggasto ang kuwarta sa mga Sugbuanon sa way pagsubay sa mga gimbut-an sa balaod?;

·         Gipili-pili ba lang diay gihapon ang mga kasayuran nga gihatag ngadto sa mga Sugbuanon bisan human sa iyang pasalig pagbutyag sa hingpit nga kamatuoran mahitungod sa CICC?; ug

·         May gitagoan ba gyod diay siyang mga transaksiyon maong morang naghuramentado nga nanghasi ug nanamastamas sa mga nangahas pagpaningil og subay sa dagkong gasto sa kuwartang di iya?   [30]  leo_lastimosa@abs-cbn.com

Arangkada for May 11, 2007

        MASAARONG UGMA

 

        Kon nagdamgo ang mga nanagan sa piniliay karong Lunes nga, sama sa naandan, mailad, malipat, mapalit ug mahudlat nilang mga botante, ug nga ang nagbaha nilang kuwarta ug makalilisang nga makinarya lang gihapoy mopatigbabaw, mas mayo tingaling magdalidali sila pagtimbakuwas.   Aron nga di sila moyaka, mongaab ug magminatay sa makauuwaw nilang kapildehan inig ka Martes.

        Ang kinabag-an sa katawhan nahigmata na.  Nga ang ilang pagpasagad, pagpabaya, pagpailad, pagduko ug pagpaawot sa way pupanaganang paglapas, pagyatak ug pagbuong sa ilang katungod, kaligdong ug kadungganan maoy nakapaalaot sa atong yutang natawhan.   Labaw sa tanan nakaamgo na nga di sila inutil, nga duna silay dakong mahimo pagtarung sa pagduma sa kagamhanan, ug nga takos silang mousab sa laksot nga dagan sa ilang kasaysayan.

-o0o-

        Mas mayo pang mag-itom na lang silang daan kay ang mosunod segurong mapukan ug hingpit nga isalikway sa nagkahiusang pagbarug ug paglihok sa mga lungsoranan nga ilang gilugpitan ug gidaugdaog sa niaging kapid-an na ka katuigan:

·         Mga politikong magpa-upoy-upoy atol sa kampanya apan kon makalingkod na sa katungdanan labihan nang kusoga nga mamanghag sa tumang kahubog sa gahom;

·         Mga politikong kawatan apan maayong magluhud-luhod, ang uban magpatukod gyod gani, sa mga simbahan ug tinuon nga makit-an sa tibuok kalibotan ang iyang kamanggihatagon pagpamisik og mumho sa gipanggutom nga kinabag-an;

·         Mga politikong magpatuong kugihan ug daghang mga proyektong napatuman, bahala na kon sobra sa katunga sa gahin ang gipaburot sa ilang pribadong panudlanan, ug bantay lang ang mga mangahas pagpaningil og subay kay taralon gyod sila labing lagyo nga mga hukmanan; ug

·         Mga politikong tikasan ug mabudhion apan nagpasiugda dayon og lapad nga kampanya paglibog ug pagbuakbuak sa katawhan aron pagtino nga mopilit siya ug magpabiling magtungkawo sa gahom bisan kon wa na saligi ni tahura sa labing daghan.

-o0o-

        Ug ipagawas nang daan ang mga kaldero ug mga trumpa kay magsabasaba ug manayaw na ta kadalanan sa pagsaulog sa tino nang kadaogan sa mosunod:

·         Mga piliunon nga bisan sa ilang kawad-on wa magpahaylo ni magpahudlat sa hakog nga mga hut-ong nga way laing tinguha gawas sa pagpalambo sa talikala sa inhustisya nga ilang gipahamtang sa kakabos ug kaburong sa kinabag-an; ug

·         Mga piliunon nga bisan sa pagbugal-bugal ug panggukod nagpadayon sa ilang mapailubon ug determinadong pagpatin-aw nga ang bugtong makapalingkawas sa katawhan gikan sa kakabos ug inhustisya mao ang ilang hiniusang pag-ilog pagbalik sa gahom pag-umol sa ilang kaugmaon.

-o0o-

        Mao ni akong damgo gabii.  Kinsay nahibawo nga matinuod ni inigmata nako karong Martes?  O bisan kanus-ang buntaga sud ning kinabuhia?   O sa usa ka labing matahom nga kabuntagon nga mamat-an sa umaabot tang kaliwatan?

        Bisag unsaon, di nila masakmit ang atong katungod ug kagawasan sa pagdamgo ug pagpangandoy.  [30]  leo_lastimosa@abs-cbn.com

Arangkada for May 10, 2007

        PULOS MALAPASON

 

        Haskang daghanang politiko, pipila nila akong mga higala, ang nangreklamo sa among gihimo sa DYAB Radyo Patrol nga paghingan sa tanang lokal ug nasudnong mga piliunon kansang campaign materials gibutang gawas sa common poster areas ug sa mosunod nga mga dapit nga gidili sa Comelec:   Poste sa suga, linya sa kuryente, punoan sa kahoy, simbahan, taytayan ug kadalanan.  May mga nanawag namo nga nanghulga nga ila ming ikiha kay gawas nga among gipakauwawan ang ilang mga ngan, amo pa gyod kunong gisabotahe ang ilang mga kandidatura.

        Wa mi mohunong sa among gihimo.  Ug malipayon kong motaho ninyo nga hangtod karon, pila na lang ka adlaw sa di pang eleksiyon sa Mayo 14, wa pay bisan usa nila nga nitinuod sa ilang hulga.   Ang mas makalipay mao nga way bisan usa sa akong mga paryente, kansang campaign materials among nakit-an nga gipataka lang og pamutang sa Dakbayan sa Talisay, nga nakaako pagpangasaba nako.

-o0o-

        Wa mi mag-awhag sa mga botante sa di pagbotar sa mga kandidato nga naghugaw-hugaw sa atong palibot.  Igo lang ming nagpahibawo sa katawhan kinsa ang mga kandidato nga nakalapas sa mga lagda sa piniliay.   Ug naa ra sa mga pumipili kon saligan ba nilang mga politiko nga wa pa ganing kalingkod sa katungdanan, o mga incumbent nga nanhangyo pa gani og lab-as nga mandato, nangyatak na sa mga balaod nga ilang gisaad nga panalipdan ug ipatigbabaw.

        Mao ni gamay namong tampo sa pagsuway pagpatuman sa mga lagda nga gitumong paghimong ligdong ug makiangayon sa piniliay.  Samtang lisod ang pagmatuod sa pinalitay sa boto, o pagpabaha og kuwarta lapas sa labing dakong kantidad nga gitakda sa Comelec, ang nagpasad nga campaign materials bantang sa tanang hingtungdan.

        Sama nga di maato sa nagpakabana nga mga kahugpongan ang paglaksi sa illegal campaign materials, di sab namo maato pagsuhid ang tanang kalapasan ug paghingan ang tanang malapason.  Nanghinaot lang mi nga ang mga botante mapugwat sa makauuwawng kalapasan ug katabangan sa ilang pagtimbang-timbang kinsay hatagan sa ilang pagsalig karong Lunes.

-o0o-

        Ang masulub-ong balita mao nga sa hapit tanang dakbayan ug kalungsoran nga naduaw sa mga sakop sa DYAB Radyo Patrol hapit tanang kandidato nakalapas sa mga lagda.  Maihap lang sa tudlo ang nakatuman.   Kadudahan pa gani kon matinumanon ba gyod sila o wa lay igong kuwarta nga ikaparang sa nagpasad nga campaign materials sa mas adunahan nilang mga kaatbang.

        Makiangayon ba nga ipasikad sa pagtahud sa mga lagda sa campaign materials ang paghukom sa mga nanagan karong eleksiyona?  O, sama sa naandan, moduko na lang ta og paawot sa mapangahasong sugyot sa way uwaw nga mga politiko nga, kay naglisod man sila sa pagtuman, ipabasura na lang nila ang mga lagda.   [30]  leo_lastimosa@abs-cbn.com

Arangkada for May 9, 2007

        LUBA SA KALIGDONG

 

        Kon magmalampuson si Gobernador Gwen Garcia pagpahunong sa imbestigasyon ni Acting Deputy Ombudsman Virginia Palanca-Santiago sa gipasangil nga mga anomaliya sa pagtukod sa Cebu International Convention Center (CICC), ang Sugbuanong mga magbubuhis maoy labing dakong pildero.   Di lang kay magpabiling misteryo giunsa paggasto ang siningtan ug hinagoan nilang buhis sa pagpabarug sa CICC, mapurnada sab ang nahaunang mga imbestigasyon sa Ombudsman sa gipasangil nga kahiwian sa ubang mga proyekto nga, sama sa CICC, gidalidali sab pagtukod alang sa niaging 12 ^th Asean Summit.

        Maayong tilimad-on ang pagdumili ni Ombudsman Merceditas Gutierrez pagpaubos ni Santiago sa preventive suspension usa ka semana na human ipasaka ni Garcia ang iyang petisyon.  Nagpasabot ni nga di diay tanang ahensiya sa kagamhanan ang mokuray sa kahadlok kon mamanghag na si Garcia.

-o0o-

        Kon simbako, layo ra to, tabukon og pito ka lawod, masuspenso si Santiago ug mapulihan og di Sugbuanon, suma sa kusganong awhag ni Garcia, mabalda kon di man hingpit nga mahunong ang mga imbestigasyon nga giduma nilang Santiago ug kaubanan sa mosunod nga gikuwestiyon nga mga proyekto sa summit:

·         Ang gitumbok nga makalilisang nga overpricing sa decorative ug street lamps sa kinatibuk-ang ruta sa summit gikan sa Marco Polo sa Dakbayan sa Sugbo ngadto sa Shangrila sa Mactan;

·         Ang giingong overpricing ug ubang palusot sa surveillance cameras nga hangtod karon wa dawata sa kapolisan nga mao untay end-user; ug

·         Ang kontrobersiyal nga pagtukod sa CICC nga gihulagway ni Crisologo Saavedra nga panglaktod, way klarong plano, way subasta, sabutsabot ra, giinat-inat ang budget, gibuakbuak ang mga kontrata ug gipaburot pag-ayong presyo.

-o0o-

        Apan may sukaranan ang panghinaot sa mga kaatbang ni Santiago nga sakyan sa Malakanyang ang nangalisbo nilang kawsa.  Kay mahimong ibaligya ang ilang kaso nga maoy labing epektibong paagi paggapos nilang Santiago ug kaubanan aron nga di makaabot ang imbestigasyon sa mga eskandalo sa summit ngadto nilang kanhi DPWH (karon defense) secretary Hermogenes Ebdane Jr. ug ubang mga suod ni Pres. Arroyo.

        Si Arroyo hingpit na hinuong nanghunaw sa kontrobersiya.  Ang daylang nga wa niya pagtambong sa rally sa iyang mga alyado sa Mandaue nga gipangulohan ni kanhi Mandaue City Mayor Teddy Ouano maoy labing uwahing sukaranan sa pagduda nga pasagdan ni Arroyo ang tanang gilambigit sa anomaliya pag-atubang sa tanang mga kasong gipasaka batok nila.

-o0o-

        Sa di pa mopadayon ang mga turutot ni Garcia paglabay sa bisan unsang lapok nga ilang makupay ngadtong Saavedra, nga samang Santiago maoy responsable sa paspas nga pagsusi sa mga eskandalo sa summit, maayo tingaling tubagon nilang mosunod nga pangutana:

Tungod sa expose ni Saavedra sa surveillance cameras ug deco lamps, nakadaginot ang kagamhanan ug ang mga magbubuhis og dul-an sa P400 milyones, sila unsa may ilang nahimo?   [30]  leo_lastimosa@abs-cbn.com

Arangkada for May 8, 2007

        SUBAY, DI BIAYBIAY

 

        Kon nagtuo ang kadagkoan sa Kapitolyo sa Sugbo nga mahilom nang mga magbubuhis sa pagpaningil og matinud-anong subay sa makalilisang nga gasto sa pagtukod sa Cebu International Convention Center (CICC) human nila pabahai og mga numero sa niaging semana, nasayop sila.   Ang gipangayo sa mga Sugbuanon kuwentada, di salida.  Ilang gitinguha nga mahibaw-an giunsa paggasto ang siningtan ug hinagoan nilang buhis.   Di nga lipatlipaton sila sa mga numero nga di matino ug gukdon ug pakauwawan ang mga nagpakabana pagbarug alang sa ilang kanunay lang mataligam-an nga mga interes.

        Ang gilaoman sa Sugbuanong mga magbubuhis mao nga pakit-on sila sa mga dokumento sa pagsubasta ug pagtukod sa CICC.  Ang maong mga dokumento ray ilang masaligan nga wa mausik ang ilang buhis, ni mosimang sa burot nang daan nga panudlanan sa mga kukhan.

-o0o-

        Hangtod karon, upat na ka buwan human natukod ang CICC, ang nadawat sa mga Sugbuanon lunlon pagarpar.  Ang panghambog sa kadagkoan sa Kapitolyo nga wa silay gitagoan dakong panlingla.   Kay sukwahi sa ilang yawit, hugtanon silang nagdumili pagpakita sa mga dokumento sa CICC ngadto sa mga magbubuhis nga nagtinguha pagtan-aw ug pagsusi sa kinatibuk-ang transaksiyon.

        Gawas sa sibaw nang awhag sa mga sakop sa media, nga ila lang gibungulbungolan, dunay pormal nga awhag ang Bayan Muna alang sa kuwentada ug mga dokumento sa CICC.  Ang suwat nadawat sa buhatan sa gobernador niadtong Pebrero 27, 2007.   Ubos sa balaod, ang Kapitolyo dunay 15 ka adlaw pag-aksiyon sa awhag.  Apan kapin na sa duha ka buwan ang nilabay, way kihol ang kadagkoan sa lalawigan.

        Gani, kon tinuod nga way gitagoan ang Kapitolyo, gitahan na unta nilang mga dokumento sa CICC ngadto sa graft investigators, di na magpaabot sa subpoena duces tecum nga mahimong luwatan sa Visayas Ombudsman batok nila.

-o0o-

        Ug kon nakalimot ang kadagkoan sa lalawigan (kay napasaran sa gutom sa upat ka takna nga tigom nga ilang gipatawag sa Capitol Social Hall niadtong Huwebes) unsay mga dokumento nga angay nilang ipakita ngadto sa mga Sugbuanon, niang papeles nga gimando sa Government Procurement Act ( R.A. 9184) nga isukip sa bidding documents:

·         Approved Budget for the contract;

·         Instructions to Bidders, including criteria for eligibility, bid evaluation and post-qualification, as well as the date, time and place of the pre-bid Conference (where applicable), submission of bids and opening of bids;

·         Terms of Reference;

·         Eligibility Requirements;

·         Plans and Technical Specifications;

·         Form of Bid, Price Form, and List of Goods or Bill of Quantities;

·         Delivery Time or Completion Schedule;

·         Form and Amount of Bid Security;

·         Form and Amount of Performance Security and Warranty; ug,

·         Form of Contract, and General and special Conditions of Contract.  [30]  leo_lastimosa@abs-cbn.com

Arangkada for May 7, 2007

       PILDE UG DAOG

 

       Kon di na kaayo ko hingatawa rong mga adlawa, pasaligan tika nga di ni tungod sa mga kasong akong giatubang.  Tungod ni sa makauuwawng pagkasilhig nilang Dwyane Wade, Shaquille O'Neal ug sa defending NBA champions Miami Heat; sa pagkapukan nilang Yao Ming ug Tracy McGrady; ug sa pagkapilde ni Oscar "Golden Boy" De La Hoya sa labing uwahi niyang pagsuway pagsemento sa iyang kabilin ug pagpaburot sa iyang katigayonan.

        Naibanan hinuon og dyutay ang akong kaguol kay gilubong man sab sa Golden State Warriors silang Dirk Nowitzki ug ang Dallas Mavericks, gipalukapa na sab sa Phoenix Suns silang Kobe Bryant ug ang Los Angeles Lakers, nakalahos na sa ikaduhang hugna sa playoffs silang Jason Kidd ug ang New Jersey Nets ug kumbinsido kaayong kadaogan nilang Rey "Boom Boom" Bautista batok ni Sergio "Rocky" Medina sa Argentina ug AJ "Bazooka" Banal batok ni Juan Alberto Rosas sa Mexico.

-o0o-

        Pipila ka takna sa wa pa mokatkat sa ring silang AJ ug Boom Boom, ang duha sa labing masilakong mga bituon sa boksing sa Pilipinas, sa MGM Grand Arena sa Las Vegas, nikatap ang text messages mahitungod sa giingong pagbanhig ug pagpatay sa labing bantogang Pinoy boxer sa atong panahon, si Manny "Pacman" Pacquiao nga nisalmot og laing matang sa bugno sa iyang yutang natawhan sa Gen. Santos.  Lahi hinuon sa naandang pagpakatap lang sa iresponsableng kasayuran, ug maayo ning tilimad-on sa kahinog na sa panabot sa minilyon nga nakahimo natong texting capital sa kalibotan, kasagaran sa text nga akong nadawat nangutana unsa katinuod ang taho.

        Ang mga pangutana gipulihan sa nagbaha nga text messages sa kadaogan nilang Boom Boom ug AJ gikan sa mga nakabati sa live coverage ni Homer Sayson sa DYAB Abante Bisaya gikan sa ringside.  Ug wa nang kapahuway ang akong telepono sa mas dakong baha sa mga pangutana kinsay nidaog sa sangka nga gawas nga gianggaan nga "makapahunong sa kalibotan," gitawag sab nga "kataposang bantogang sangka" sa himatyong kalibotan sa boksing.

-o0o-

        Nisuway ko pagpangita og websites nga naghimo og live coverage sa sangka nilang Floyd "Pretty Boy" Mayweather ug De La Hoya.  Akong natultolan ang live blog sa BBC ug AOL, kansang reporters kuyog nilang Homer ug sa laing gatosan ka mga sakop sa media nga gitugotang makalingkod sa ringside.  Nagsugod ang sangka alas-11:40 sa buntag (oras sa Sugbo) samtang naghinapos nang kulba hinam ug mapangahason nga pagpanung sa Utah Jazz sa korte sa Houston Rockets.

        Gidominahan ni De La Hoya ang ikaduha, ikatulo ug ikaupat nga hugna.  Nakabawos si Mayweather sa ikaunom.  Apan natagak ang akong internet connection samtang labaw nang Jazz, 99-98, 48 segundos ang nahibilin sa duwa.  Wa gihapoy makabentaha sa buhing paghulagway ni Homer.  [30]  leo_lastimosa@abs-cbn.com

Arangkada for May 6, 2007

       MAO RA NI?

 

       Sa labing unang higayon, nakasud ko sa Cebu International Convention Center.  Salamat sa gipasiugdahan ni Mandaue City Acting Mayor Ading Seno nga pagbukas sa CICC ngadto sa Sugbuanong mga magbubuhis pagtimaan sa tinuig nga pangilin sa Dakbayan sa Mandaue.  Kabahin ko sa unang hut-ong sa mga nitubag sa pagdapit ni Seno.  Kinsa nipasabot nga pipila ray nakatunga kay tingtrabaho pa, apan nahurot nang mga tiket nga giapud-apod sa iyang buhatan alang sa adlawng Dominggo.

        Gipakita mi og audio-visual presentation nga nagpahinumdom sa kamahinungdanon ug kamakasaysayanon sa papel sa CICC sa tigom sa mga pangu sa kanasuran sa habagatan ug silangang Asya niadtong Enero.  Ug dayon gilibot na mi sa pinili nga mga lawak sa duha ka andana nga building, nga gihulagway sa Agence France Presse (AFP) nga "morang gamayng shopping mall nga way mga bintana."

-o0o-

        Si Mayor Seno wa kapugong sa iyang kaugalingon sa pag-ingon nga pipila ka bahin sa CICC mas maayong tan-awon sa telebisyon kay sa linawas.  Niuyon niya ang ubang nanguyog sa guided tour nga nitawag sa akong pagtagad (ang uban mas kusog og tingog kay sa uban nga kuwang na lag diyutay nga naghagawhaw, ambot tungod tingali sa kaikog sa mahigalaon nga mga tinugyanan sa Kapitolyo nga mapailubong nigiya namo aron pagtino nga di mi mangasaag ni manud sa gitak-opang mga lawak) sa mosunod nga ilang nabantayan sa upat pa ka buwan nga building:

·         Pipila ka bahin sa bungbong sa lobby nangliki na;

·         Tumoy sa bungbong sa ikaduhang andana nahup-ak na ug gamay na lag kuwang nga matagak ang nagkawil-kawil nga tipaka;

·         Ang mouldings sa lobby nangahup-ak na;

·         Ang carpet sa plenary hall nagburutburot na;

·         Pipila ka pultahan sa mga pansayan naguba na; ug

·         Peryodista nga nakasud atol sa summit ang nitudlo namo sa dapit nga nagtulo sa pagbunok sa uwan.

-o0o-

        Apan ang labing makahuloganon nga paniid naggikan sa usa pundok sa batan-ong mga lalaki nga nituaw (pasaligan hinuon tika nga hinay gihapong ilang tingog ug wa madunggi sa mga tagduma):  "Mao ra ni?"

        Klaro kaayo nga kasagaran sa among kaubanan nagsubay sa mga balita.  Mahimo ganing nakadungog sila sa pasangil ni Crisologo Saavedra nga dul-an na sa bilyon ang tinuod nga naggasto sa CICC.  O sa pag-angkon sa Kapitolyo nga madugangan pang P581 milyones nga gasto tungod sa "reconfiguration."  Lisod tinuod nga pangitaon ang makalilisang nga gasto sa kayano sa building.

        Ang bisan unsang pagduda sa mga nanguyog sa kamakiangayon sa gasto napapas dihang ila ming gida sa luho nga pultahan nga nag-ambo sa mga barungbarong sa makaluluoy nga mga biktima sa sunog sa Guizo ug Mantuyong nga wa pang kapabarug pagbalik sa ilang mga panimay.  [30]  leo_lastimosa@abs-cbn.com

Arangkada for May 5, 2007

        CICC BUKSAN SA PUBLIKO

 

        Si Mandaue City Acting Mayor Ading Seno malipayong nipahibawo atol sa sinemanang Kapamilya Media Forum sa DYAB Abante Bisaya ug Sky Cable nga gipahigayon sa SM City Cebu Entertainment Plaza nga makaangkon na gyod og kahigayonan ang Sugbuanong mga magbubuhis pagtan-aw sa Cebu International Convention Center (CICC).   Matod ni Seno nga, pinaagi ning iyang gasa sa mga Mandauehanon nga magsaulog sa ilang tinuig nga kapiyestahan karong buwana, makaangkon na gyod og kahigayonan ang katawhan pagsusi makiangayon bang naggasto ang buhis nga ilang siningtan ug hinagoan.

        Upat ug tunga ka takna ra hinuong buksan ang CICC ngadto sa publiko, gikan sa alas-9 hangtod alas-11 sa buntag ug gikan sa alas-2 hangtod sa alas-4:30 sa hapon.  50 lang ka tawo ang pasudlon sa usa ka higayon aron kahatagan sila og guided tour.   Ug sa lakang nga makapaamgo sa iyang mga kaatbang unsa kamahinungdanon ang iyang pagka acting mayor sa Mandaue, malipayong gipahibawo ni Seno nga ang tanang gustong mosud sa CICC kinahanglang mokuha og pases gikan sa iyang buhatan.

-o0o-

        Si Acting Mandaue City Mayor Jonas Cortes, kandidato pagka mayor sa Team Honesty, kinsa naglingkod tapad ni Seno atol sa media forum, nipahibawo sa iyang plano pagtugyan sa pagduma sa CICC ngadto sa pribadong sektor aron pagtino nga di ni mausik.   Gikuwestiyon ni Cortes ang kamapuslanon sa gipatuman karon nga hinugpong nga pagduma tali sa Kapitolyo sa Sugbo ug sa Mandaue City Hall.  Apan sa samang higayon nitataw si Cortes nga angayng tinud-on pagsusi nasubay bang tanang mga lagda sa dinalidali nga pagtukod sa CICC alang sa niaging 12 ^th Asean Summit.

        Sa iyang bahin, si kanhi Mandaue City Councilor Magno Dionson, kandidato pagka mayor sa Bando Mandaue Anak Bisaya, niingon nga di maayong tilimad-on ang tigbayon sa CICC alang sa Mandaue.   Kay nahimo ning tinubdan sa di maayong mga panghitabo sa Mandaue ug sa Sugbo.  Matod niya nasuspenso si kanhi mayor Teddy Ouano tungod sa mga eskandalo sa summit ug mahimong masuspenso sab ang uban pang lokal nga mga opisyal tungod sa mga pasangil sa overpricing ug ubang mga anomaliya sa CICC.

-o0o-

        Wa katunga sa media forum si Jonkie Ouano, kandidato pagka mayor sa Power Team 4.  Maong sa makausa pa napakyas na sang among pagsuway pag-abot sa tanang kandidato sa giisip nga usa sa labing higpit nga piniliay pagka mayor sa tibuok Sugbo.

        Nakahigayon si Cortes pagpakita sa pipila ka mga biktima sa pagpanghasi ug pagpangulata nga ilang gipasangil sa mga Ouano.  Nipasangil siya nga mga sakyanan sa City Hall ug kapolisan ang gigamit sa armadong mga tawo.   Nipasalig hinuon si Seno nga nagkasabot na sila si Mandaue City Police Director Alexander Abadinas paghimo og mga lakang aron pagtino nga di hingpit nga magkadugo ang nagpadayong kampanya sa Mandaue.   [30]  leo_lastimosa@abs-cbn.com

DYAB & ABS-CBN Cebu Anchor Leo Lastimosa

Anchoring TV Patrol Central Visayas from Fuente, Cebu City, Philippines

DYAB Cebu Kumbira sa Kapamilya in June 2006

DYAB Cebu Kumbira sa Kapamilya in June 2006

DYAB Cebu Kumbira sa Kapamilya in June 2006

DYAB Cebu Kumbira sa Kapamilya in June 2006

DYAB Cebu Kumbira sa Kapamilya in June 2006 

DYAB Anchors

Kapamilya Bloodletting Campaign

Frank Adlawan

Bob Malazarte

Joel Belocura 

Arangkada for March 15, 2006

 

WA PA MATUMAN

 

Si Tata Cinco-Sy, area manager sa ABS-CBN Broadcasting Corporation sa Sugbo ug Central Visayas, nagsud-ong sa nagbuntaog nga mga sinakong bugas ug mga sinina, kinartong sardinas ug noodles ug ubang pagkaon nga gipabaha sa nagpakabana nga mga Sugbuanon sa among broadcast complex sa Jagobiao, Mandaue City alang sa mga biktima sa bangis nga pagdahili sa bukid sa Kan-abag nga hingpit nga nitabon sa tibuok barangay Guinsaugon sa St. Bernard, Southern Leyte, nakahunahuna nga ang mga tinun-an nga nailo di lang sa ilang mga ginikanan kon dili apil na sa ilang yutang natawhan nagkinahanglan og labaw pa sa relief goods.

Ang iyang sugyot paghatag og scholarship alang sa mga tinun-an sa Guinsaugon gidasonan dayon nilang Chairman Edward Abad sa Kapisanan ng mga Brodkaster ng Pilipinas (KBP) ug Cebu City Councilor Gerardo Carillo atol sa tigom pagplano sa Radiothon sa tanang estasyon sa radyo ug telebisyon sa Sugbo alang sa Southern Leyte.   Madasigon sang gipaluyohan ang scholarship sa kadagkoan sa Junior Chamber International (JCI) Central Visayas kinsa nibukas dayon og bank account sa PhilAmBank alang sa cash donations sa tibuok adlaw nga Radiothon sa Fuente Osmena niadtong Pebrero 20.

-o0o-

        Apan gisugat ang mga tigpasiugda sa dakong babag.  Unsaon pag-ila ang mga tinun-an sa Guinsaugon nga nagtungha sa Sugbo.   Sa wa pa mi mahugno sa kakuti sa gimbuhaton, giluwas ming Barangay Kapitan Joel Garganera sa Tinago, Cebu City.  Ginamit ang iyang mga kadugo ug kasuod sa lokal nga mga opisyal sa St. Bernard, paspas nga nakuha ni Garganera ang lista sa mga tinun-an nga gipamatud-an ni Mayor Maria Lim ug sa DSWD.  Maong ang sugyot ni Ma'am Tata nakabuylo dayon.

        Ang DYAB Abante Bisaya nakatigom nag kapin sa P100,000 gikan sa mga Sugbuanon nga nihatag og gikan sa P2 ngadto sa P20,000.  Kabahin sa pondo nahatag na sa 15 ka mga tinun-an pagbayad sa ilang boarding houses, pagkaon, plitehan og mga panginahanglan sa eskuylahan sa mga buwan sa Pebrero ug Marso.

-o0o-

        Ang KBP-JCI Radiothon ug ang konsiyerto sa labing inilang mga banda sa Sugbo nga gipangulohan ni Angela Calina maoy nakatigom sa labing dakong kantidad, kapin sa P600,000.  Apan bisan sa paglibre sa mga eskuylahan sa matrikula sa mga tinun-an, dako pang kuwang paglahutay pagtubag sa batakang gasto sa mga tinun-an sa mosunod nga upat ngadto sa lima ka tuig.

        Maong ang Ramon Aboitiz Foundation Inc. (RAFI), nga maoy gipalihug pagduma sa progama, nagpakitabang sa ubang manggihatagong mga indibiduwal ug mga institusyon.   Si RAFI Executive Director Dominica Chua nitataw nga angayng patunghaon di lang ang 15 ka tinun-an kon dili hasta nang gatosan ka tinun-an sa high school sa Guinsaugon nga mahimong anhi sab motungha sa Sugbo.

        Ang ideya ni Ma'am Tata, samtang nilambo na, wa pa hingpit nga matuman.  [30]  leo_lastimosa@abs-cbn.com

Arangkada for March 14, 2006

 

          LUNSAYNG TABANG

Ang tanang institusyon nga motabang sa pagtungha sa mga tinun-an sa Guinsaugon hangtod nga makatiwas sa ilang mga kurso sa mga unibersidad dinhi sa Sugbo pormal nang mopirma og kauyonan nga maglatid sa ilang mga obligasyon atol sa Kapamilya Media Forum sa DYAB Abante Bisaya ug Sky Cable karong Biyernes, Marso 17, sa SM City Entertainment Plaza.

Ang draft sa memorandum of agreement (MOA) giapod-apod na sa Ramon Aboitiz Foundation Inc. (RAFI), nga maoy gipalihug nga magsilbing tagduma sa tanang pondo nga makolekta alang sa mga tinun-an ug tigpatuman sa scholarship program sa mosunod nga upat ngadto sa lima ka tuig, aron masubli sa mga institusyon. Gikatakdang hingpiton ang mga probisyon sa MOA atol sa tigom sa tanang mga tigpasiugda karong Miyerkules aron maandam na sa pinirmahay sa Biyernes.

-o0o-

Apil sa mga institusyon nga mopirma sa MOA mao ang Kapisanan ng mga Brodkaster ng Pilipinas (KBP), Cebu City government, Junior Chamber International (JCI) Central Visayas ug ABS-CBN Broadcasting Corporation. Gidapit sab nga mosalmot sa pinirmahay ang kadagkoan sa mga tulunghaan nga manggihatagong nilibre sa matrikula sa mga tinun-an, ang University of the Visayas (UV), University of Cebu (UC), Southwestern University (SWU), Cebu Doctor's University (CDU), University of San Carlos (USC) ug Besavilla Engineering Review Center.

Gipaabot nga manambong sab ang mga indibiduwal nga labing unang nitubag sa panawagan sa DYAB Abante Bisaya alang sa hingpit nga scholarship sa mga tinun-an: Silang Gloria Suma (nga andam mosagop sa usa ka tinun-an), Cebu City Councilor Nestor Archival, Atty. Ramsey Quijano, Edwin Minerva ug ubang nagpakabanang Sugbuanon nga nihangyo nga di ipaila.

-o0o-

Mosaksi sa pinirmahay ang 15 ka mga tinun-an sa Guinsaugon, apil nang tulo nga mogradwar na karong buwana. Samtang libre nang ilang matrikula, dako pa ang kuwang sa gasto sa ilang pagkaon, plitehan ug ubang panginahanglan sa mosunod nga upat ngadto sa lima ka tuig. Ang labing dakong donasyon, ang kapin sa P600,000 nga natigom sa radiothon sa KBP ug JCI itunol na sab ngadto sa RAFI karong Biyernes.

Ang kabahin sa kapin sa P100,000 nga nahipos sa "Sagop Kapamilya Campaign" sa DYAB Abante Bisaya ug ABS-CBN Cebu nahatag na ngadto sa mga tinun-an alang sa ilang abangan sa boarding houses, pagkaon, plitehan ug ubang panginahanglan sa mga buwan sa Pebrero ug Marso.

Si UV President Eduardo Gullas, subay sa kampanyang "Bunga sa Gugma", nipirma na sa kauyonan pagpatiwas sa walo nila ka tinun-an nga taga Guinsaugon. Atol sa ika-101 nga sumad sa adlawng natawhan sa iyang inahang si Josefina "Inday Pining" Gullas, ang kongresista nipasalig pagahin og P5,000 matag tinun-an matag tuig tingtungha hangtod nga mahuman sa ilang tagsatagsa ka kurso. [30]  leo_lastimosa@abs-cbn.com

Arangkada for March 13, 2006

 

       BAKAK NI GLO

 

       Human gibisto sa lokal nga mga opisyal sa St. Bernard ug sa Southern Leyte nga P6 milyones ray donasyon nga ilang nadawat—P3M sa lungsod ug P3M sa lalawigan—angayng mohatag na og husay ang nagkalainlaing mga ahensiya sa gobyerno ug pribadong mga organisasyon nga giwarawara sa tibuok kalibotan ang "minilyon" ka pesos nilang hinabang alang sa mga biktima sa katalagman.   Apil na ini ang pipila ka local government units sa Sugbo nga mapagarbuhong nipahibawo nga kuwarta ang ilang ihatag sa Southern Leyte kay ang lokal nga mga opisyal ang labing nahibawo unsay gikinahanglan sa mga biktima.

       Gihatag ba gyod nilang kuwarta o kutob lang sa pagarpar?   Ang kahugpongan sa labing dagkong mga magpapatigayon nga gipangulohan ni Lucio Tan nipahibawo nga nakahatag nag P20 milyones.  Apan dihang gisubay ni Bise Gobernador Mike Maamo sa Southern Leyte nahibaw-an nga P2 milyones nga balor sa relief goods ray nadawat sa mga biktima.  Ang P18 milyones gigasto diay sa ayroplano, hotels ug pagkaon sa pagbiyahe paingon sa St. Bernard ug balik sa luho nilang mga buhatan sa Metro Manila.

-o0o-

       Ang pagkadugmok sa nasakpan nga labing uwahing plano sa pagpukan sa pamunoan ni Pres. Arroyo, nga nisunod sa pagkabasura sa impeachment complaints ug sa giisnab nga mga awhag sa people power, di gihapon makahatag og maayong kinatulgan alang sa mga nagtungkawo sa Malakanyang.   Mahilom lang ang mga protesta kon matubag nang gamot nga hinungdan sa lapad nga pagduda sa kaligdong sa nasudnong liderato.

       Ang pagdumili ni Pres. Arroyo pagpatin-aw ngadto sa katawhan sa iyang pakigsulti ni kanhi Comelec commissioner Virgilio Garcillano sud sa 15 ka higayon atol sa iskutenyo sa eleksiyon sa 2004 maoy labing lig-ong garantiya nga di siyang katiwas sa iyang termino hangtod sa 2010.   Mao ni mokumbinser di lang sa mga sundawo ug mga obispo kon dili hasta na sa ubang nangiyugpos nga mga sektor sa katilingban nga bahala nag way takos nga ikapuli di mahimong tubagon lag pamakak ang usa sa labing dakong politikanhong eskandalo sa kasaysayan sa nasud.

-o0o-

       Ang iresponsableng pagpakatap sa text messages nga nagpasidaan sa mga pag-ulbo sa bulkan, paghubas sa dagat, tsunami ug pagdahili sa mga bungtod maoy pahinumdom sa katakos ning modernong teknolohiya sa komunikasyon pagpaukyab sa katawhan.   May mga tilimad-on nga ang mga nagpataka lag forward sa text messages gigamit sa mga tawong mas malisyuso og tuyo.

       May mga pamilya nang nagplano pagbakwet gikan sa isla sa Olango bisan sa pasalig sa Pagasa ug Phivolcs nga binuang ang nagkasungi nga mga pasidaan sa tsunami ug paghubas sa dagat.   Dunay pagduda nga ang panghadlok gipasiugdahan sa mga negosyante nga nagplanong makabarato sa pagpalit og mga luna alang sa ilang tukurong mga negosyo sa Olango.   [30]  leo_lastimosa@abs-cbn.com

Arangkada for March 12, 2006

 

            P2M NGA PONDO

 

            Dugang hinabang ang nadawat sa mga paningkamot pagtigom og igong kuwarta alang sa edukasyon sa mga tinun-an sa Guinsaugon, St. Bernard, Southern Leyte nga nia mag-eskuyla sa Sugbo.  Ang Grains Retailers Confederation (Grecon) pinaagi sa ilang Sugbuanong nasudnong presidente, Teresa Alegado, nitunol ngadto sa DYAB Abante Bisaya ug ABS-CBN Cebu og P10,000 nga tseke alang sa mga tinun-an.   Si Nonoy Tirol ug ubang mga tigpasiugda Rajah Park Hotel Poker Tournament nga himoon na karong Biyernes nisaad sa pagtampo sa kita sa torneyo ngadto sa scholarship fund.

            Ang University of the Visayas (UV), nga maoy tulunghaan sa pito sa 15 ka nailo nga mga tinun-an, pormal nang mopirma sa kauyonan pag-abaga sa minilyon ka pesos nga gasto sa matrikula ug dormitoryo sa mga tinun-an hangtod nga makatiwas sa ilang mga kurso.   Himoon ni human sa Santos nga Misa sa UV main campus karong Lunes, Marso 13, pagtimaan sa ika-101 nga sumad sa adlawng natawhan ni Doña Josefina Gullas.

-o0o-

            Ang Kapisanan ng mga Brodkaster ng Pilipinas (KBP), Cebu City government ug Junior Chamber International (JCI) Central Visayas pormal na sang motunol sa kapin sa P600,000 nga natigom sa tibuok adlaw nga Radiothon nga giapilan sa mga estasyon sa radyo ug telebisyon sa Sugbo niadtong Pebrero 20 ug konsiyerto sa labing inilang mga banda sa Sugbo niadtong Pebrero 23.   Ang kantidad maoy labing dako nga tampo alang sa scholarship fund.

            Si Cebu City Councilor Gerardo Carillo nisaad pag-awhag sa Cebu City Council pagahin og P300,000, samtang ang Kapitolyo nipasalig paghatag sa kapin sa P200,000 nga sobra sa P1 milyon nga donasyon gikan sa Bigfoot International, alang sa mga tinun-an.   Ubang pribadong mga institusyon nagtuon na sab sa kahigayonan nga motampo sila sa gikinahanglan pondo.

            Si Dominica Chua sa Ramon Aboitiz Foundation Inc. nga maoy gipalihug pag-umol sa mga lagda sa scholarship ug pagduma sa pondo nisugyot nga buksan ang kampanya sa tanang matinabangon nga mga indibiduwal ug mga organisasyon samtang iyang giandam ang mga dokumento nga papirmahan sa tanang nisaad pag-abaga sa edukasyon sa mga bata.

-o0o-

            Gawas sa UV, nisaad na sab paglibre sa matrikula sa mga tinun-an ang University of Cebu (tulo ka tinun-an), Southwestern University (duha), University of San Carlos (usa), Cebu Doctor's University (usa) ug Besavilla Engineering Review Center (usa).   Sa ato pa, ang nahibiling kolektahunon sa mga tigpasiugda mao ang bayranan sa dormitoryo (gawas sa pito ka tinun-an nga gilibre na sa UV), pagkaon, plitehan, mga libro ug ubang gastohan.

            Sa kuwentada nilang Barbara Cabo ug ubang taga bangko nga sakop sa JCI, gikinahanglan ang dul-an sa P2 milyones ang gikinahanglan.   Dako pag kuwang ang among natigom bisan kon mohatag ang tanang nisaad.  Maong sa makausa pa, bisan di takos, mangahas na sab mi pagpanuktok sa imong maaghop nga kasingkasing.   [30]  leo_lastimosa@abs-cbn.com

Arangkada for March 9, 2006

 

      HAING HINABANG?

Gitunol na sa kadagkoan sa ABS-CBN Broadcasting Corp. ang pasiunang hinabang ngadto sa mga tinun-an sa Guinsaugon, St. Bernard, Southern Leyte nga nia mag-eskuyla sa Sugbo. Ang dul-an sa P100,000 nahipos sa DYAB Abante Bisaya sud lang sa tulo ka adlaw gikan sa Sugbuanong mga indibiduwal ug mga kompaniya nga naluoy sa mga tinun-an nga nailo sa ilang mga ginikanan ug mga igsoon tungod sa pagdahili sa kabahin sa bukid sa Kan-abag nga sa usa lang ka pamilok nitabon di lang sa ilang kabalayan kon dili apil na sa tibuok nilang barangay.

Ang hinabang maoy motubag sa labing dinaliang mga panginahanglan sa 15 ka tinun-an, sama sa ilang pagkaon, abang sa boarding houses, plitehan, mga bayranan sa gradwasyon (alang sa tulo) ug ubang kalihokan pagtapos sa semestre (alang sa nahibiling 12). Kini samtang gihingpit pang mga lagda sa mas dakong kalihokan pagtigom og mas dakong pondo alang sa scholarship sa kinabag-an nila sa mosunod nga upat ka tuig.

-o0o-

Ang Ramon Aboitiz Foundation Inc. (RAFI) nakaumol na sa draft sa mga lagda sa scholarship. Sublion ni sa mosunod nga mga adlaw sa ABS-CBN, KBP, JCI Central Visayas, Cebu City government ug ubang mga institusyon nga motabang sa mga tinun-an. Ang mauyonan nilang sistema maoy itanyag ngadto sa mga Sugbuanon sa pagtiwas pagkolekta sa kuwartang mohingpit sa gibanabanang P2 milyones nga gikinahanglan sa mga tinun-an pagtiwas sa ilang mga kurso.

Ang labing dakong panginahanglan sa mga tinun-an—ang ilang matrikula—gipanghinaot nga abagahon na sa ilang mga eskuylahan. Ang labing unang nilibre sa tanang bayranan mao ang University of the Visayas nga dunay pito ka tinun-an. Gani, ang UV nilusad dayon sa kampanyang "Bunga sa Gugma" nga gitumong pagtabang di lang sa mga tinun-an kon dili sa tanang biktima sa katalagman sa Southern Leyte.

Librehon sab sa Cebu Doctor's University ang usa ka tinun-an sa nursing ug sa Besavilla Review Center ang usa ka tinun-an nga mokuha na sa Engineering board exam karong Mayo. Padayon pang nagtuon kon mohatag ba sa samang benepisyo ang University of Cebu nga dunay tulo, Southwestern University, duha, ug University of San Carlos, usa.

-o0o-

Dunay dakong problema ang mga opisyal sa Southern Leyte: Sa binilyon ka pesos nga hinabang nga gisaad sa nagkalainlaing kanasuran ug pribadong kahugpongan, P3 milyones ray nadawat sa St. Bernard. Ang kuwarta igo rang ibayad sa pito ka ektaryang luna nga balhinan sa 800 ka pamilya sa Guinsaugon ug laing unom ka barangay nga nahulga sa dugang pagdahili sa yuta.

Unsa may nahitabo? Nanghambog ba lang ang UN, US ug ubang kanasuran? O, sama sa naandan, nasangit sa luyang burukrasya? O, suma sa gikahadlokan, nisimang sa pribadong mga panudlanan? [30]  leo_lastimosa@abs-cbn.com

Call DYAB Absolutely FREE

DYAB AM is the only radio station in the Philippines which you can call from anywhere in the world absolutely free.  Thanks to DB Edwards' VOIP technology through iNTouch, you can call us from 4 a.m. to 12 midnight (Philippine time), Mondays to Fridays.  All you need is a headset.

 

You can greet your Kapamilyas in Cebu and the Visayas and Mindanao over the AM radio station of ABS-CBN Broadcasting Corp. in Cebu Philippines .  You can also use our Internet Phone to air public service announcements for your families and friends in the Philippines.

 

Or you can tell us situationers/updates/comments about major news events in your place of work or urgent concerns of Overseas Filipino Workers (OFWs).  Let DYAB AM serve as your bridge to government agencies which can help you or your loved ones, like the Dept. of Foreign Affairs (DFA), Overseas Workers Welfare Administration (OWWA), Philippine Overseas Employment Administration (POEA), the Office of the President, local government units (LGUs) and private employment and placement agencies.

 

Bawat Pinoy Kapamilya.

 

Tawag Na!

Call DYAB Absolutely Free

Thanks to DB Edwards' iNTouch VOIP technology, you can now call DYAB AM from wherever in the globe by simply clicking on Leo Lastimosa's picture. You can call during Arangkada's time slot, 6-10 a.m., RP Time.